من أجمل ما كتب العبقرى الجميل صلاح جاهين و التى بدأها سنة 1959 و كان ينشرها أسبوعيا فى مجلة صباح الخير و حتى عام 1962 وذلك حين انتقل للعمل بجريدة الأهرام ثم عاد لكتابتها مرة أخرى بعدما رجع لمجلة صباح الخير يا مصر رئيسا لتحريرها و ذلك لعام واحد و كف عن كتابة الرباعيات نهائيا الا عدد خمس رباعيات نشرها فى مربعه بالاهرام تعليقا على مظاهرات الطلبة عام 1968
و هذا الكلام نقلا عن بهاء جاهين.
( 1 )
مع ان البشرمن أصل طين
و كلهم بينزلوا مغمضين
بعد الدقايق و الشهور و السنين
تلاقى ناس أشرار و ناس طيبين
و عجبى!!!
( 2 )
عجبى عليك.. عجبى عليك يا زمن
يا أبو البدع يا مبكى عينى دمأّ
أزاى أنا أختار لروحى طريق
و أنا اللى داخل فى الحياة مرغماّ
و عجبى !!!
( 3 )
مرغم عليك يا صبح مغصوب يا ليل
لا دخلتها برجليا و لا كان لى ميل
شايليننى شيل دخلت أنا الحياة
و بكره ح اخرج منها شايليننى شيل
و عجبى !!!
( 4 )
سنوات و فايتة عليا فوج بعد فوج
واحدة خدتنى ابن و التانية زوج
و التالتة أب خدتنى و الرابعة اية..
ايه يعمل اللى بيحدفه موج لموج؟
و عجبى !!!
( 4 )
و أنا فى الضلام.. من غير شعاع يهتكه
أقف مكانى بخوف و لا أتركه
و لما ييجى النور و أشوف الدروب
احتار زيادة..أيهم أسلكه
و عجبى!!!
( 5 )
نظرت فى الملكوت كتير و انشغلت
و بكل كلمة ( ليه؟ ) و ( عشانيه ) سألت
أسأل سؤال.. الرد يرجع سؤال
وأخرج و حيرتى أشد مما دخلت
و عجبى !!!
( 6 )
خرج أبن أدم م العدم قلت : ياه
رجع ابن أدم للعدم قلت : ياه
تراب بيحيا .. وحى بيصير ترا
الأصل هو الموت و الا الحياة .؟
و عجبى !!!
( 7 )
ضريح رخام فيه السعيد اندفن
و حفرة فيها شريد من غير كفن
مريت عليهم.. قلت يا للعج
الاتنين ريحتهم فيها نفس العفن
و عجبى !!!
( 8 )
ياما صادفت صحاب و ما صاحبتهمش
و كاسات خمور و شراب و ما شربتهمش
أندم على الفرص اللى انا سبتهم
و لا على الفرص اللى ما سبتهمش
و عجبى !!!
( 9)
و الكون ده كيف موجود من غير حدود
و فيه عقارب ليه و تعابين و دود
عالم مجرب فات و قال سلامات
ده ياما فيه سؤالات من غير ردود
و عجبى !!!
( 10)
غدر الزمان يا قلبى ما لهوش أمان
و حاييجى يوم تحتاج لحبة ايمان
قلبى ارتجف و سألنى... أأمن بايه؟
أأمن بايه محتار بقالى زمان
و عجبى !!!
(11 )
يا باب يا مقفول..امتى الدخول
صبرت ياما و اللى يصبر ينول
دقيت سنين .. و الرد يرجع لى : مين؟
لو كنت عارف مين أنا .. كنت أقول
و عجبى !!!
( 12 )
أنا شاب لكن عمرى و لا ألف عام
وحيد و لكن بين ضلوعى زحام
خايف و لكن خوفى منى أنا
أخرس و لكن قلبى مليان كلام
و عجبى !!!
(13)
أحب أعيش و لو أعيش فى الغابات
أصحى كما ولدتنى أمى و ابات
طائر..حوان..حشرة..بشر..بس أعيش
محلا الحياة.. حتى فى هيئة نبات
و عجبى !!!
( 14 )
سهير ليالى و ياما لفيت و طفت
و ف ليلة راجع فى الضلام قمت شفت
الخوف كأنه كلب سد الطريق
و كنت عاوز أقتله.. بس خفت
و عجبى !!!
( 15 )
عجبتنى كلمة من كلام الورق
النور شرق من بين حروفها و برق
حبيت اشيلها ف قلبى.. قالت حرام
ده انا كل قلب دخلت فيه اتحرق
و عجبى !!!
( 16 )
قالوا الشقيق بيمص دم الشقيق
و الناس ما هياش ناس بحق و حقيق
قلبى رميته و جبت غيره حجر
داب الحجر ...و رجعت قلبى رقيق
و عجبى !!!
( 17 )
يوم قلت آه..سمعونى قالوا فسـد
ده كان جدع قلبه حديد و اتحســد
رديت على اللايمين أنا و قلت .. آه
لو تعـــرفوا معنى زئـير الأســد
و عجبى !!!
( 18 )
بين موت وموت ... بين النيران و النيران
على الحبل ماشيين الشجاع و الجبان
عجبى علادى حياة .. و يا للعجب
أزاى أنا - ياتخين - بقيت بهلوان
و عجبى !!!
( 19)
أنا قلبى كان شخشيخة أصبح جرس
جلجلت به صحيوا الخدم و الحرس
أنا المهرج ... قمتوا ليه خفتوا ليه
لاف ايدى سيف و لا تحت منى فرس
وعجبى !!!
( 20 )
دخل الربيع يضحك لقانى حزين
نده الربيع على اسمى لم قلت ميب
حط الربيع أزهاره جنبى و راح
وايش تعمل الأزهار للميتين
و عجبى !!!
( 21 )
مهبوش بخربوش الألم و الضياع
قلبى و منزوع م الضلوع انتزاع
يا مرايتى يا اللى بترسمى ضحكتى
يا هلترى ده وش و الا قناع
و عجبى !!!
( 22 )
حبيت لكن حب من غير حنان
و صاحبت لكن صحبة ما لهاش أمان
رحت لحكيم و اكتر لقيت بلوتى
ان اللى جوه القلب مش ع اللسان
و عجبى !!!
( 23 )
ليه يا حبيبى ما بيننا دايما سفر
ده البعد ذنب كبير لا يغتفر
ليه يا حبيبى ما بيننا دايما بحور
أعدى بحر ألاقى غيره أتحفر
و عجبى !!!
(24 )
كان فيه زمان سحلية طول فرسخين
كهفين عيونها و خشمها بربخين
ماتت .. لكين الرعب لم عملره مات
مع انه فات بدل التاريخ تاريخين
و عجبى !!!
ليست هناك تعليقات:
إرسال تعليق